Tuesday, December 9, 2008

சூப்பர் சர்க்கஸ்





லக்கி லுக்கை தெரியாதவர்களுக்கு மட்டும்,
வழக்கமான கௌபாய் ஹீரோக்களை கிண்டல் செய்வதற்காக உருவாக்கப்பட்டவர்தான் லக்கி லுக். தன் நிழலை விட வேகமாக சுடக் வடிய திறமை வாய்ந்தவர். குதிரை சவாரி செய்வதில் கில்லாடி. இவருக்கு இருக்கும் ஒரே உற்ற தோழன் தன்னுடைய குதிரை ஜாலி ஜம்பர் மட்டுமே. புத்திசாலியான திறமை வாய்ந்த குதிரையும் கூட. இவர்களுக்கு இலக்கே கிடையாது. தாங்கள் செல்லும் வழியெல்லாம் பிரச்சினைகளில் சிக்கிக் கொள்ளும் அப்பாவிகளுக்கு உதவுவதே இவருடைய தலையாய கடமை. இவருடைய கதைகள் எல்லாமே சிரிப்பு தோரணமாகவே அமைந்திருக்கும். இனி கதை.
கோயட் கோட்டை என்னும் நகரத்தில் குதிரை போட்டி வருடந்தோறும் நடைபெறும். அதி கலந்து கொள்வதற்காக லக்கி லுக் செல்கிறார். செல்லும் வழியில் ஆபத்தில் சிக்கிக் கொள்ளும் சர்க்கஸ் குழுவினருக்கு உதவி செய்து அவர்களையும் தம்மோடு கோயட் கோட்டைக்கு பத்திரமாக அழைத்து செல்கிறார். அந்த ஊரில் ரீகன் என்னும் கொடியவன் அந்த ஊரையே தன் கட்டுப்பாட்டில் வைத்துள்ளான். வருடந்தோறும் குதிரை போட்டியை பார்த்த ஊர் மக்களுக்கு புதிதாக ஊருக்குள் வரும் சர்க்கஸ் காண ஆவலோடு இருக்கின்றனர்.
இதை அறிந்த ரீகன் தான் நடத்தும் குதிரைப் போட்டிக்கு போட்டியாக வந்த சர்க்கஸை அங்கிருந்து துரத்த சாரைப்பாம்பு சார்லி என்னும் திறமையான துப்பாக்கி வீரனை அனுப்புகிறான். இதை அறிந்த லக்கி லுக் அவனை சர்க்கஸ் குழுவினரிடம் சிக்க வைத்து படாத பாடு படுத்துகிறார். தான் பட்ட அவஸ்தைகளால் எதிரில் வரும்யானையை கூட குறிபார்த்து சுட முடியாமல் அங்கிருந்து தலைதெறிக்க ஒடி வந்து விடுகிறான். தன் திட்டம் தோல்வியடைந்ததை கண்டு தானே செயலில் இறங்குவது என்று முடிவெடுத்து தன் அடுத்த நாச வேலையை செவ்விந்தியர்கள் மூலமாக சர்க்கஸ் கூடாரங்களை தீக்கு இரையாக்குகிறான். சர்க்கஸ் நடத்த முடியாமல் நின்று விடுகிறது. ஊர் மக்களும் வேறு வழியில்லாமல் குதிரை போட்டியை காண செல்கின்றனர். முடிவில் இதுதான் சமயம் என்று எண்ணி சர்க்கஸ் குழுவினரும் குதிரை போட்டியில் கலந்து கொண்டு தங்களுடைய கோமாளித் தனமான திறமைகளை நிருபித்து அனைவரையும் இரசிக்க வைத்து சிரிக்க வைக்கிறார்கள் மக்களின் ஆர்வத்தையும் இவர்களுடைய திறமைகளையும் நேரில் கண்டு மனம் திருந்திய ரீகனும் சர்க்கஸில் தானும் ஒருபார்ட்னராக சேர்ந்து கொண்டு உலகம் முழுவதும் சர்க்கஸின் புகழை பரப்புகிறார்கள்.
இந்த சீரியஸான கதையை காமெடித் திருவிழாவாக வரைந்து அசத்தியுள்ளார் கோஸ்ஸினி மற்றும் மௌரிஸ். நான் இரசித்து படித்த காமிக்ஸ் கதைகளில் இதுவும் ஒன்று.







Sunday, December 7, 2008

இலயன் காமிக்ஸ் க்ளாஸிக்ஸ் பற்றி ..................

மதிப்பிற்குரிய இலயன் காமிக்ஸ் ஆசிரியருக்கு,
பழைய புதிய வாசகர்கள் நிறைய பேரிடம் பழைய காமிக்ஸ் புத்தகங்கள் கிடையாது. அதனால் தாங்கள் கொண்டு வந்துள்ள காமிக்ஸ் க்ளாஸிக்ஸ் ஒரு வரவேற்கதக்க முயற்சி.
ஆனால் இதை கடமைக்காக சேகரிக்கலாமே தவிர அனைவரும் படிக்கக்கூடிய நிலையில் புத்தகத்தின் தரமோ, எழுத்துக்களோ இல்லை. ஏதோ இதை தாங்கள் கடமைக்காக இந்த இதழை போடாமல் அனைவரும் இதையும் சேகரிக்கிற மாதிரி போடலாமே?
தாங்கள் ஒரு புத்தகத்தில் இரு கதைகளை போடுவதற்கு பதிலாக ஒரே கதையாக நல்லதரமாக உதாரணத்திற்கு மெக்ஸிகோ படலாம் இதுமாதிரி போடலாமே?
அடிக்கடி தாங்கள் மறுபதிப்பு செய்த கதைகளையே திரும்ப திரும்ப போடாமல் இதுவரை மறுபதிப்பே செய்யாத நல்ல கதைகள் நிறைய உள்ளன. அவையெல்லாம் தாங்கள் வெளியிட்டால் இன்னும் சிறப்பாகவும், அனைவருக்கும் மகிழ்ச்சியாகவும் இருக்கும்

அன்புடன்
ப்ருனோ

Thursday, December 4, 2008

தன்னை தானே தேடும் ஒரு சாகசகாரனின் கதை


துப்பாக்கியால் சுடப்பட்டு தன்னுடைய நினைவாற்றலை இழந்து உயிருக்கு போரடிக் கொண்டிருக்கும் ஒரு இளைஞனை மீட்டு அவருடைய உயிரை காப்பாற்றி தன்னுடனே வைத்திருக்கும் ஒரு வயதான தம்பதியினர். அவருககு இருக்கு ஒரே அடையாளம் XIII என்ற எண் மட்டுமே.

தீடிரென ஒருநாள் கொலைகார கும்பல் ஒன்று அங்கு வந்து அந்த வயதான தம்பதிகளை XIII யும் கொல்ல முயற்சிக்கிறார்கள். திறமையாக அவர்களுடன் போராடி அவர்களில் சிலரை கொன்று விடுகிறான். அந்த குமபலின் தலைவன் மங்கூஸ் மட்டும் தப்பி விடுகிறான்.

இவர்கள் ஏன் கொல்ல வந்தார்கள்? தான் யார் போலீஸா? கொலைகாரனா? தனக்கு குடும்பம் இருக்கிறதா? இல்லையா? என்ற கேள்விகளுக்கெல்லாம் விடை தேடி ஈஸ்ட் டவுன் என்னும் ஊருக்கு செல்கிறான்.

தான் செல்லும் ஊரெல்லாம் ஒவ்வொரு பெயரில் இருந்திருப்பதை கண்டு மேலும் குழப்பமடைகிறான்.தான் ஸ்டீவ் ராலாண்ட் என்னும் பெயரில் ஜனாதிபதியை கொன்று இதற்காக ஒரு பெருந்தொகையை பெற்றிருப்பதை கண்டு அதிர்ச்சி அடைகிறான்.

இந்த பணத்திற்காக ஒரு கும்பல் அவனை துரத்துகிறது. ஒரு பக்கம் கொலைகார கும்பல் ஒன்று அவனை கொல்ல துரத்துகிறது. ஒரு பக்கம் ஜனாதிபதியை கொன்ற குற்றத்திற்காக விசாரணை கமிஷன் அதிகாரி துரத்துகிறார். எல்லோரிடமிருந்தும் தப்பி எல்லா உண்மைகளையும் எப்படி கண்டு பிடிக்கிறார் என்பது தான் இந்த தொடரின் கதை.

ஒரு சதிகார கும்பல் அதில் பதிமூன்று பேர்கள் அங்கம் வகிக்கிறார்கள். அவர்களுக்கு பெயர்கள் கிடையாது. எண்கள்தான் அவர்களுக்கு அடையாளம். அந்த எண்களை தங்கள் நெஞ்சில் பசைச் குத்திக் கொள்வார்கள். இந்த குழுவில் உள்ள கூலிப்படைத் தலைவன் மங்கூஸ் இதே குழுவில் உள்ள காப்டன் ஸ்டீவ் ராலண்ட் என்னும் ராணுவ அதிகாரியை ஜனாதிபதி வில்லியம் ஷெரிடனை கொல்ல நியமிக்கிறார் இவரும் ஜனாதிபதியை கொன்று அதற்கு சன்மானமாக பெருந்தொகையை பெற்றுக் கொண்டு வரும் வழியில் அவரையும் அந்த கூட்டத்தில் உள்ளவர்களால் கொல்லப்படுகிறான். ஜனாதிபதியின் அப்பா பெரும் செல்வந்தர். அவருக்கு மிகவும் விசுவாசமானவர்களை மட்டும் அழைத்து என் மகனை கொன்றவர்கள் யார்? அவர்களுடைய உண்மையான நோக்கம் என்ன? அந்த அங்கத்தில் உள்ளவர்களை எல்லாம் கண்டறியவும் உண்மைகளை கண்டறியவும் ஒரு குழுவை உருவாக்குகிறார். இந்த கதையின் ஹீரோ ஜேஸன் ப்ளை கியூபாவில் கொரில்லா போர் பயிற்சி பெற்ற ஒரு சகலகலா வல்லவர் இந்த குழுவில் அவரும் பங்கு பெறுகிறார்.

அவருக்கு ஸ்டீவ் ராலண்ட் போலவே முகமாற்று அறுவை சிகிச்சை மூலம் முகத்தை மாற்றி அமைத்து அவருடைய மனைவி கிம் ராலாண்ட் மூலம் ஜேஸன் ப்ளைக்கு நடைஉடைபாவனைகளை எல்லாம் சொல்லித் தந்து அச்சு அசலாக அவரைப்போலவே உருவாக்கி அந்த கும்பலை கண்டறிய அனுப்புகிறார்கள். இவரையும் அந்த சதிகார கும்பல் சுட்டுத் தள்ளி விடுகிறது.

அதன்பிறகுதான் உயிர் பிழைத்து தன் நினைவாற்றலை இழந்து தன்னுடைய கடந்த காலங்களை தேடி பல இன்னல்களுக்கும் துன்பங்களுக்கும் ஆளாகி பெரும் போராட்டத்திற்கு பின் சதிகார கும்பலில் உள்ள அனைவரின் முகத்திரையை கிழித்து அந்த கும்பலின் தலைவன் வாலி ஷெரிடன் (எண் 1) (கொல்லப்பட்ட ஜனாதிபதியின் தம்பி) என்பதையும் தான் நிரபராதி என்பதையும் மற்ற அனைத்து உண்மைகளையும் நீதியின் முன் நிறுத்தி தான் குற்றமற்றவர் என நிருபணமாகி விடுதலையாகிறார்.

அற்புதமான விறுவிறுப்பான இந்த கதைக்கு இப்படியும் ஒவியங்களை வரைய முடியுமா? என்று பலபேர்களின் புருவத்தை உயர்த்தி வியக்க வைத்துள்ளார் வில்லியம் வான்ஸ். காமிக்ஸ் கதைகளில் இதை ஒரு மகுடமாக சேர்க்கலாம்.

நான் மிகவும் இரசித்து படித்த காமிக்ஸ் கதைகளில் இதுவும் ஒன்று.

பின்குறிப்பு

இந்த கதை ஒரிஜினல் பிரன்ஞ் மொழியில் 19 பாகங்களாக வெளிவந்துள்ளது. இதை ஒரே இதழாக நமது இலயன் காமிக்ஸில் அடுத்த வருடம் லயன் கலெக்டர்ஸ் ஸ்பெஷலாக ரூ.200 விலையில் பெரிய அளவில் பிரமாண்டமாய் 800 பக்க இராட்சஸ சைஸில் வெளிவருகிறது.