Thursday, May 7, 2009

சித்திர நினைவலைகள்



காமிக்ஸ் புத்தகங்கள் பற்றிய கருத்து கணிப்பு எடுத்தால் அதில் ஆச்சர்யமும் அதிர்ச்சியும்தான் நிறைந்திருக்கும். தமிழ் காமிக்ஸ் புத்தகங்கள் 1970-ம் வருடம் முதல் வெளிவந்து கொண்டிருந்தாலும் 1984-ம் வருடம் முதல் 1995-ம் வருடம் வரைதான் காமிக்ஸ்களுக்கு பொற்காலமாக விளங்கியது.

இந்த காலக்கட்டத்தில்தான் ஏராளமான தமிழ் காமிக்ஸ் புத்தகங்கள் புதிது புதிதாக மாதந்தோறும் வெளிவந்த வண்ணமாக இருந்தன. அவற்றில் முத்து காமிக்ஸ், இந்திரஜால், மாலைமதி, லயன், ராணி, அசோக், திகில், முத்து மினி காமிக்ஸ், சக்தி, மினி லயன், ஜேம்ஸ்பாண்ட் காமிக்ஸ், டார்ஜான் காமிக்ஸ், பார்வதி, மதி காமிக்ஸ், மேகலா காமிக்ஸ், மலர் காமிக்ஸ் ரேகா காமிக்ஸ், கஸ்துரரி காமிக்ஸ், பொன்னி காமிக்ஸ் என பல காமிக்ஸ் புத்தகங்கள் வெளிவந்து காமிக்ஸ் வாசகர்களுக்கு கொண்டாட்டமாக இருந்த காலமும் கூட.

எதை வாங்குவது எதை படிப்பது என்று திக்குமுக்காடிய காலகட்டமும் கூட. 1995-ம் வருடத்திற்கு பிறகு இதன் நிலையோ தலைகீழாக மாறிவிட்டது. புயலில் சிக்கி காணாமல் போன மாதிரி நிறைய புத்தகங்கள் காணாமல் போய்விட்டன. தற்போது லயன் காமிக்ஸ் மற்றும் முத்து காமிக்ஸ் என்ற இரு இதழ்கள் மட்டுமே வெளிவந்து கொண்டிருக்கின்றன.
வருடத்திற்கு ஆறு பிரதிகள் வருவதே அபூர்வமாக உள்ள நிலை. இந்த நிலைக்கு புத்தகங்கள் குறைந்தது பற்றி பார்ப்போமேயானால் கீழ்க்கண்ட காரணங்கள் காணக்கிடைக்கின்றன

பதிப்பாளர்களிடம் சரியான திட்டமிடுதல் இல்லாதது. விளம்பரங்கள் இல்லாததது. சரியான தேதிகளில் புத்தகங்கள் கடைகளில் கிடைப்பதில்லை. புதிய முயற்சிகள் அறவே இல்லை. புதிய வாசகர்களும் இல்லை. நிறைய வாசகர்கள் சரியான நேரத்தில் புத்தகங்கள் கிடைக்காத ஏமாற்றத்தில் படிப்பதையே குறைத்து விட்டனர்.

மீண்டும் புத்தக பதிப்பாளர்கள் புதிய முயற்சிகளுடன் தரமான கதைகளை மாதம் தவறாமல் வெளியிட்டு கடைகளில் கிடைக்க வைத்து புத்தகத்திற்கென்று கூடுதல் கவனம் செலுத்தினால் இந்த துறையில் மீண்டும் பழையபடி முத்திரை பதிக்கலாம்.

தற்போதைய காலகட்டத்தில் எவ்வளவோ பொழுதுபோக்கு அம்சங்கள் இருந்தாலும் சித்திரக் கதைகளுக்கு என்றென்றும் தனி மவுசு உண்டு என்பதை பதிப்பாளர்கள் உணர வேண்டும். உதாரணத்திற்கு, சென்னையில் ஜனவரி 2009 -ல் நடந்த புத்தக கண்காட்சியில் சித்திரக் கதை புத்தகங்களும் விற்பனை செய்யப்பட்டன. யாருமே எதிர்பார்க்காத வண்ணம் அனைத்து புத்தகங்களும் விற்று தீர்ந்தன. சிறுவர்களும் பெரியவர்களும் ஆவலுடன் புத்தகங்களை அள்ளிச் சென்றனர். முன்பு போல் தமிழில் சித்திரக் கதைகள் நிறைய வெளிவராதா என ஏங்கிக் கொண்டிருக்கும் வாசகர்கள் இன்னும் பலர் உள்ளனர். சித்திரக் கதை புத்தகங்கள் என்றுமே நசிந்து விடாமல் இன்னும் ஏராளமான புதிய புத்தகங்கள் முன்புபோல் வெளிவர வேண்டுமென்பதே அனைவரது ஆவலாகவும் உள்ளது.