Thursday, March 5, 2009

பயங்கர புயல் - இயற்கையின் சீற்றத்தை துல்லியமாக காட்டியிருக்கும் ஒரு மகத்தான சித்திரக் கதை

டாகோ-டாகோ என்னும் அழகிய தீவில் இந்த கதை தொடங்குகிறது. அங்கு ஓய்வெடுக்க வந்து சேரும் பிரின்ஸ் குழுவினர் பார்னேயின் பழைய அடிதடி நண்பர் லோபோவை சந்திக்க நேர்கிறது. லோபோ ஒரு தீவை சூதாட்டத்தில் ஜெயித்த விவரத்தை சொல்லி அந்த தீவிற்கு அழைத்து செல்கிறார்.
அந்த தீவினை உரிமை கொண்டாடும் அண்ணன்-தங்கை டெட்டி மற்றும் கிறிஸ்டி இருவரும் அங்கு வசிக்கும் கானக வாசிகளை துணையாக வைத்துக் கொண்டு தீவில் வசிக்கிறார்கள். பிரின்ஸ் குழு மற்றும் லோபோவினை அந்நியர்களாக நினைத்து அவர்களை விரட்டியடிக்க நினைக்கும்போது, டெட்டி தவறி கடலில் விழுந்து விடுகிறான். அந்த தீவின் கரையோரத்தில் வசிக்கும் ஒரு ராட்சஸ ஜந்து ஒன்று அவனை துரத்துகிறது. அதிலிருந்து பிரின்ஸ் அவரை காப்பாற்றுகிறார். தன் உயிரை காத்த நன்றிக் கடனாக சமாதானமாகும் டெட்டி அவர்களுடன் சேர்ந்து தொல்லை கொடுத்து வரும் அந்த ராட்சஸ ஜந்துவை கொல்ல ஆயத்தமாகிறார்கள்.
அந்த ஜந்துக்கு நிறைய கடல் மீன்களை உணவாக போட்டு அது அரை மயக்க நிலையில் இருக்கும்போது வேட்டையடலாம் என்ற திட்டத்துடன் இருக்கும்போது, அந்த தீவில் வசிக்கும் காட்டுவாசிகளின் தலைவன் இவர்களின் குறுக்கீட்டினை விரும்பாமல் அந்த மீன்களில் ஒருவித வெறியை ஊட்டும் மருந்தினை கலந்து விடுகிறான்.
இரவு கடலில் உலவ போகும் பார்னேவை கொல்ல ஆட்களையும் அனுப்புகிறான். அந்த போராட்டத்தில் டெட்டி இறந்து விடுகிறான். இவனின் சதித் திட்டம் தெரியாமல் பிரின்ஸ் குழுவினர் கடலுக்கு வேட்டையாட செல்கின்றனர். இதற்கிடையில் கடலில் ஒரு பயங்கர புயல் ஒன்று உருவாகி வருவது யாருக்குமே தெரியவில்லை.
மருந்து கலந்த மீன்களை உண்ட ராட்சஸ ஜந்து வெறிக் கொண்டு இவர்களை தாக்குகிறது. அதனுடன் அவர்கள் கடலுக்கடியில் போராடிக் கொண்டிருகையில், மேலே பயங்கர புயல் ஒன்று ஆக்ரோஷமாக தாக்கிக் கொண்டிருக்கிறது. இந்த இயற்கை மற்றும் செயற்கை சதிகளிலிருந்து பிரின்ஸ் குழுவினர் எவ்வாறு தப்புகின்றனர் என்பது தான் இந்த சித்திர கதை.
தனியாக கடற்கரையில் உலவப் போகும் பார்னேவை கொல்ல எதிரிகள் கத்தியுடன் வருவார்கள். அச்சயமத்தில் பார்னே தன் கையில் வைத்திருக்கும் துப்பாக்கியை காட்டி அவர்களை சுட முயல்வார். அவர்களுக்கு துப்பாக்கி என்றால் என்னவென்ற தெரியாத நிலையில் துப்பாக்கியை உதறி கையால் தாக்குவார். இதுவே என் மனதை கவர்ந்த இடம்.